भिक्षुणीयात बलात्कार याःपिंत कडा काबाहीया माग
थीथी जातीय व धार्मिक संघसंस्थातय्सं वंगु असार १० गते संखुवासभाया सभाखोलाय् भिक्षुणीदथुइ जूगु मंकाः बलात्कारया दोषीयात कडा कार्बाही व पीडितयात क्षतिपूर्तिया माग याःगु दु । येँया जनसञ्चार अभियानय् पत्रकार सम्मेलन यानाः नेपाल तामाङ घेदुङ, लामा घेदुङ, बौद्ध घ्याङगुथि, राष्ट्रिय मुस्लिम मञ्च, क्रिश्चियन सुझाव समिति लगायतया झिंन्यागू संघसंस्थां थज्याःगु माग याःगु खः ।
पत्रकार सम्मेलनय् नेपाल आदिवासी जनजाति महासंघया मू छ्याञ्जे आङकाजी शेर्पां घटनां महासंघयात स्तब्ध याःगु धासें दोषीदथुइ कडा कार्बाही, पीडितयात उचित न्याय व क्षतिपूर्ति बिइत माग यानादिल । वय्कलं आदिवासी जनजाति व थीथी धार्मिक समुदायसं जुइगु घटनायात गम्भीरतापूर्वक मस्वइगु तीतो यथार्त जूगु धासें छु नं हालतय् दोषीयात कार्बाही मजुइकं उन्मुक्ति बिइगु कुतः जूसा महासंघं कडा पलाः न्ह्याकेगु ख्याच्वः बियादिल ।
ज्याझ्वलय् सभासद् आङदावा शेर्पां उगु बलात्कारया घटना छम्ह मिसा दथुइ जक मजुसे सिंगो धार्मिक सम्प्रदायया आस्थादथुइ हे बलात्कार जूगु धयादिल । वय्कलं राज्यं हे दण्डहीनतायात प्रसय बियाच्वंगु धासें पीडितयात उपचार व दोषीयात कार्बाही याकेत मिसा सभासद्तय्गु ककसपाखें थःम्हं सः तयेगु प्रतिबद्धता प्वंकादिल । वंगु असार १० गते धरानपाखें संखुवासभा वंबलय् सभाखोलाय् संखुवासभाया नीछदँया भिक्षुणी संगिता लामा बसया स्टाफतपाखें मंकाः बलात्कारय् लाःगु खः ।
वय्कः आः अर्धचेत अवस्थाय् भरतपुरया सिलगुडीइ उपचार जुयाच्वंगु व भिक्षुणीलिसे दुगु छगू लख व स्वीद्वः धेबा नापं लुयाः मवःगु थःथिति सूर्य बहादुर तामाङं पत्रकार सम्मेलनय् जानकारी बियादिल । घटनाया दोषी बसया चालक राजु लिम्बु, बसया मेपिं स्टाफत भुवन गुरुङ, सोभित मगर, अभिशेख मगर व द्रोण बहादुर राईयात ज्वनाः संखुवासभा प्रहरीं कुनातःगु दु ।
