सेनाया ध्यबा दुरुपयोग मजूगु दावी
येँ (सन्ध्या टाइम्स)/नेपाली सेनाया सैनिक कल्याण कोषया ध्यबा दुरुपयोग मजूगु दावी प्रधानसेनापति छत्रमानसिंह गुरुङं यानादीगु दु। संसदया सार्वजनिक लेखा समितिया बैठकय् वनाः प्रधानसेनापाति गुरुङं कल्याणकोषया गतिविधि पारदर्शी जूगु दावी यानादीगु खः ।
कोषया गतिविधि दुथ्याकाः प्रतिवेदन दँय्दसं लेखा समितियात बुझे यानाच्वनागु दु धासें वय्कलं सेनाया कल्याण कोष स्वयेगु जिम्मेवारी कयातःम्ह सहायक रथी कुलचन्द्र थापां कोषय् थौंकन्हय् १६ अर्ब ८६ करोड तका दुगु जानकारी बियादीगु खः। वय्कलं समस्याग्रस्त बैंकय् कोषया ध्यबा दुगु जूसां डुबे मजुइमा धकाः कुतः यानाच्वनागु जानकारी बिसें वय्कलं समस्याग्रस्त नेपाल विकास बैंकय् ३२ करोड, युनाइटेडय् ६ करोड व सम्झना फाइनान्सय् १ करोड ६६ लाख तकाः कोषया निक्षेप दु धयादिल। समितिया बैठकय् रक्षा सचिव नवीन घिमिरे व उच्च सैन्य अधिकारीत नं उपस्थिति जूगु खः ।
नेपाल प्रहरी कल्याणकारी कोषया ध्यबा हिनामिना जूगु खबर जानकारी वयेवं समितिं नेपाली सेनाया कोषय् चिउताः तयाहःगु खः ।
