संकल्प प्रस्ताव बारे सहमति मजुइवं थौं नं सदन अवरुद्ध

माओवादीं संसदय् संकल्प प्रस्ताव पेश यायेगु धा:गु खँय् नेपाली कांग्रेस, एमाले लगायतया दलतय्सं असहमति प्वंकूगुलिं माओवादीया सभासदतय्सं थौंया व्यवस्थापिका संसद नं अवरुद्ध याःगु दु ।

माओवादीं राष्ट्रपतिं याःगु पलाःया विरुद्ध संसदय् संकल्प प्रस्ताव पेश यायेत सहमति प्वंकूसाः संसद अवरुद्ध मयायेगु खँ धा:गु खसा: थौं कांग्रेस व एमालेया बैठकं अदालतय् विचाराधिन मुद्दाया विषयलय् सदनय् सहलह यायेमज्यूगु धासें थुकीया विरोध याःगु खः ।

थौ स्वताः ईलय् च्वंगु व्यवस्थापिका संसदया बैठकय् नं माओवादी सभासदतय्सं नाराबाजि यानाः रोष्ट्रम घेराउ यायेवं कन्हय् न्हिनय् स्वताः ईलय् तकया निंतिं सदन स्थगित जूगु दु ।