पत्रकारतय्गु सुरक्षाया लागि सरकार प्रतिबद्ध
सूचना नापं संचारमन्त्री अग्नी सापकोटां पत्रकारतय्गु सुरक्षाया लागि सरकार प्रतिबद्ध दुगु खँ धयादिल ।
न्यूनतम पारिश्रमिक निर्धारण समिितं थौं येँय् ग्वसाः ग्वःगु ज्याझ्वलय् न्ववानादिसें मन्त्री सापकोटां संचारख्यःयात व्यवस्थित व मर्यादित दयेकेत थः न्ह्यानाच्वनागु धयादिसें शान्ति व संविधानयात निष्कर्षय् थ्यंकेत मू मू दलत दथुइ सहकार्य जुइमाःगु खँय् बः बियादिल । वय्कलं पत्रकारया पारिश्रमिक अप्वयेकेत सरकार न्ह्याये धुंकूगु नं धयादिल ।
ज्याझ्वलय् प्रेस काउन्सिलया नायः नारायण शर्मा, संचार मन्त्रालयया सचिव श्रीधर गौतम, पत्रकार महासंघया नायः शिव गाउँले, संचार मन्त्रालयया सहसचिव नारायण प्रसाद रेग्मी लिसेंया ब्यक्तितय्सं संचारख्यःयात व्यवस्थित दयेकेत सरकारं ठोस ज्या यायेमाःगु धयादिल ।
अथेहे ज्याझ्वलय् न्यूनतम पारिश्रमिक निर्धारण समितिया नायः गोविन्द आचार्यं श्रमजीवि पत्रकार ऐन प्रभावकारी कथं कार्यान्वयनया लागि समिितं ज्या यानाच्वंगु जानकारी बियादिल ।
