"नेपाःया बुद्ध बोधिसत्व प्रस्तरमूर्ति" सफू पितब्वज्या

नेपालभाषा एकेदमिया कुलपति नापं संस्कृतविद् हनेबहःम्ह सत्यमोहन जोशीं थौं छगू ज्याझ्वःया दथुइ बौद्ध अध्ययन केन्द्रीय विभागया नायः डा. मिलन रत्न शाक्यं च्वयादीगु " Ancient Stone Images of Buddha & Bodhisattva in Nepal" नांया सफू पितब्वज्या यानादीगु दु ।

नेपाल तथा एशियाली अनुसन्धान केन्द्र सिनासपाखें पिथंगु थुगु सफुली नेपाःया मध्यकालिन प्राचीन इतिहासय् मौर्यकालं निसें नेपाल सम्वतया प्रारम्भ तक बुद्ध-बोधिसत्वया प्रस्तर मूर्तितय्गु लिधंसाय् नेपाःयात ऐतिहासिक कथं म्हसीकेत तिबः जुइगु खँ बक्तातय्सं चर्चा यानादिल ।

ज्याझ्वलय् त्रिभुवन विश्वविद्यालयया रेक्टर सूर्यलाल अमात्य, लुम्बिनी बौद्ध विश्वविद्यालयया कुलपति डा. त्रिरत्न मानन्धर, इतिहासकार तुलसीराम बैद्य, च्वमि डा. मिलनरत्न शाक्य, सिनासया कार्यकारी निर्देशक प्रा. डा. यज्ञप्रसाद अधिकारीपिन्सं सफूयात कयाः नुगः खँ प्वंकादीगु खः ।

अंग्रेजी भासं च्वयातःगु उगु सफुलिं नेपाल पर्यटन वर्ष २०११ ताःलाकेगुली तकं योगदान जुइ धइगु विश्वास कयातःगु थुगु सफूया पितब्वज्या ज्याझ्वः येँया पर्यटन बोर्डय् जूगु खः ।