माओवादीं शान्ति सम्झौता अःखः ज्या याःगु
नेपाली कांग्रेसया कार्यवाहक सभापति रामचन्द्र पौडेलं शानित संविधान निर्माण व लोकतन्त्रलिसे प्रधानमन्त्रीया कुर्सी हिलेमफइगु खँ धयादिल ।
नेपाली कांग्रेसया पुलांम्ह सभापति नापं प्रधानमन्त्री मदुम्ह गिरीजा प्रसाद कोइरालाया जन्म जयन्तिया झ्वलय् नेपाली कांग्रेस येँ कार्यसमितीं थौं ग्वसाःग्वःगु ज्याझ्वलय् न्ववानादिसें कार्यवाहक सभापति पौडेलं १२ गू बुँदाया शान्ति सम्झौताय् गिरिजा प्रसाद कोइरालालिसें ल्हाःचिं तयादीम्ह माओवादी नायः पुष्पकमल दाहाल "प्रचण्डं" कोइराला मदयेधुंकाः सम्झौता अःखः ज्या याःगुलिं शान्ति प्रकृया व संविधान च्वयेगु ज्या पूवनेमफूगु तकं द्वपं बियादिल ।
शान्ति सम्झौता दुने च्वनाः माओवादीं ज्या याःगु खःसा शान्ति प्रकृया व संविधान च्वयेगु ज्या पूवनीगु खँ धयादिसें कार्यवाहक सभापति पौडेलं माओवादी मखूगु व भ्रमया राजनीतिपाखे न्ह्यावनाच्वंगु तकं धयादिल ।
ज्याझ्वलय् प्रजातन्त्रया लागि जीवंकाःछि योगदान बियादीम्ह प्रजातन्त्र सेनानी श्यामलाल श्रेष्ठयात नं हंगु खः ।
