अन्ततः लोकतन्त्रया विधिवत् अन्त्य

अन्ततः जनतापाखें जनताया लागिं जनतां हे शासन यायेगु लोकतन्त्रया सर्वमान्य सिद्धान्तया असामयिक अवसान जूगु दु । निगू निगू थासय् पराजित जूम्ह एमालेया उम्मेदवार भाजु माधव नेपालयात हे देय्या प्रधानमन्त्री दयेकेगु निर्णयया नापनापं देशय् लोकतन्त्रया नं विधिवत् अन्त्य जूगु दु । गुम्ह मनूयात जनतां लोकतन्त्रया सर्वसम्मत विधि चुनावपाखें अस्वीकार याःगु खः वयात हे जनता उपर शासन याइम्ह प्रधानमन्त्री दयेकेगु दलतय्गु निर्णयपाखें चुनाव लोकया मत व जनताया अभिमत धइगु नं वास्तवय् क्यनेगु वा जक जुयाच्वन धइगु खा हानं छक्वः पुष्टि जूगु दु ।

देय्या प्रधानमन्त्री पदय् माधव नेपालया थ्व आरोहण नेपाःया लोकतान्त्रिक राजनीतिया इतिहासय् युग युग तकं हाकुगु अध्यायया रुपय् ल्यनाच्वनीगु खँय् विवाद मदु । राजनीतिक दाउपेच म्हितेगु झ्वलय् छम्हेसिया ल्हातय् वनेमाःगु सत्ता मेम्हेसिया ल्हातय् वनीगु अस्वाभाविक मखु । तर अज्याःगु खेलय् जनतायात पूर्णरुपं 'बाइकट' याःगु धाःसा नेपाली जनता उपर जूवंगु अक्षम्य अपराध खः । नेपाःया राजनीतिक पार्टीतय्सं नेपाली जनता उमिगु मत व उमिगु अभिव्यक्तियात गुलि महत्व बिउगु जुयाच्वन धइगु खँ नं थुकिं खुलस्त याना बिउगु दु । भारतय् पूरा पार्टीयात चुनाव त्याकेगु अभियान न्ह्याकाः विजयी जूम्ह राहुल गान्धीं न्ह्यःने वयाच्वंगु प्रधानमन्त्री पदयात अस्वीकार याःगु घटनापाखें माधव नेपाल थेंज्याःम्ह परिपक्व नेतां भ्याः हे शिक्षा मकायेगु वय्कःपाखें शासित नेपाली जनताया दुर्भाग्य खः । गुम्ह मनुखं जनताया अभिमतयात थुलि तःधंगु अपमान याइ वं जनताया भिं याइ धकाः गय् भलसा कायेगु ?

More Stories Like this