न्यागू बुँदे सहमति अनुगमनया निंतिं समिति नीस्वन
संविधानसभाया म्याद थप यायेत प्रमुख स्वंगू दलत दथुइ जूगु न्यागू बुँदे सहमति अनुगमन यायेत सभामुख सुभाषचन्द्र नेम्वाङया संयोजकत्वय् झिंन्हय्म्ह दुजः दुगु अनुगमन समिति नीस्वंगु दु ।
व्यवस्थापिका संसदया सोमवाः च्वंगु मुँज्यां सभामुखया संयोजकत्वतय् नीस्वंगु अनुगमन समितिइ उपसभामुख पूर्णकुमारी सुवेदी सहसंयोजक कथं च्वनादीगु दुसाः माओवादीपाखें निम्ह, कांग्रेस, एमाले व संयुक्त लोकतान्त्रिक मधेशी मोर्चापाखें निम्ह-निम्ह, चिधंगु दलतपाखें प्यम्ह व मिसा कोटापाखें छम्ह दुजः कथं ल्यःगु दु ।
समितिइ माओवादीपाखें प्रमुख सचेतक पोष्टबहादुर बोगटी सहित सभासद्त गिरिराजमणि पोखरेल, हिसिला यमी व पम्फा भुसाल, कांग्रेसपाखें प्रमुख सचेतक लक्ष्मण घिमिरे व सभासद् विमलेन्द्र निधि व एमालेपाखें प्रमुख सचेतक भीम आचार्य व सभासद् राधा ज्ञवाली दुजः कथं च्वनादीगु दु ।
अथेहे मधेशी मोर्चापाखें रामजन चौधरी व आत्माराम प्रसाद साह, चिधंगु दलतपाखें परि थापा, प्रतिभा राणा, प्रेमबहादुर सिंह व सरित गिरी व मिसा कोटापाखें कमला थापा दुजः कथं दी ।
