फ्रि तिब्बतया आन्दोलन जुइमबीत राजदूत होउलानया इनाप

नेपाःया निंतिं चीनया न्हूम्ह राजदूत याङ होउलानं नेपालय् फ्रि तिब्बत सम्बन्धि छुं नं कथंया आन्दोलन जुइमबीत इनाप यानादीगु दु ।

सोमवाः सुथय् उपप्रधान नापं गृहमन्त्री कृष्णबहादुर महरानाप खँल्हाबंला यानादिसें राजदूत होउलानं चिनियाँ कम्युनिष्ट पार्टीया ९०क्वःगु स्थापना दिवसया झ्वलय् नेपालय् फ्रि तिब्बत सम्बन्धि आन्दोलन जुइफुगु प्रति च्यूताः प्वंकादीगु खः ।

लिसलय् गृहमन्त्री महरां नेपाःया भूमी छिमेकी देय्तय् विरुद्ध छ्यलेबीगु नेपाःया नीति मदुगु स्पष्ट यानादिल । वय्कलं नेपाः सरकार फ्रि तिब्बत सम्बन्धि आन्दोलन प्रति सचेत जूगु धयादिसें नेपालय् चीन विरोधी छुं नं गतिविधि जुइमबीगु धयादिल ।

उगु इलय् राजदूत होउलानं गृहमन्त्री महरायात उपयुक्त ई मिले यानाः चीन भ्रमण यायेत चीन सरकारया पाखें ब्वनापौ नं बियादीगु खः ।