कार्यसमितिं उपसमितियात प्रतिवेदन लःल्हात

संविधान निर्माणया झ्वलय् खनेदुगु विवाद समाधान यायेत नीस्वंगु उपसमिति अन्तर्गतया कार्यदलं थःगु प्रतिवेदन उपसमितियात लःल्हाःगु दु ।

उपसमितिया सोमवाः च्वंगु मुँज्याय् कार्यदलया संयोजक लक्ष्मणलाल कर्णं उगु प्रतिवेदन पेश यानादीगु खः । प्रतिवेदनय् शासकीय स्वरुपय् प्रत्यक्ष निर्वाचित राष्ट्रपति व संसदपाखें निर्वाचित प्रधानमन्त्री जुइगु 'फ्रेन्च मोडल' प्रस्ताव यानातःगु दु ।

अथेहे राज्य पुनर्संरचना सम्बन्धी खनेदुगु ७९गू विवादयात म्हो यानाः २५गू विवादय् क्वकाःगु दु । कार्यदलं शासकीय स्वरुपया २२गू व राज्य पुनर्संरचनाया २५गू विवाद दनीगु प्रतिवेदन उपसमितियात लःल्हाःगु खः ।

कार्यदलं लःल्हाःगु प्रतिवेदन बारे आः उपसमितिया मेगू मुँज्याय् सहलह जुइ । मेगू मुँज्या वइगु बिहीवाः च्वनीगु ज्याझ्वः दु ।