तुइन चबुनाः त्रिशूलीइ प्यम्ह बेपत्ता

गोरखाया घ्यालचोकं धादिङया बेनिघाट-८ भैंसेगौंडा पाखे वनाच्वंगु तुइन चबुनाः प्यम्ह मनूत त्रिशूली खुसिइ बेपत्ता जूगु दु । सोमवाः सुथय् ११ बजे पाखे तुइन चबूगु ख: । तुइन चबुना: बेपत्ता जूपिं फुक्कं गोरखा घ्यालचोकया स्थानीय मनूत खः । तुइनय् क्षमता स्वयां अप्व यात्रुत च्वनावंगुलिं चबूगु अनुमान याःगु दु ।

उगु घटनाय् लानाः ३०दँया निशा श्रेष्ठ, ३६दँया अमृत श्रेष्ठ, ३६दँया रञ्जित गैरे नेपाली व ३५दँया जगनारायण श्रेष्ठ बेपत्ता जूगु दु । घटना जुइवं बेनीघाट प्रहरी व गजुरी प्रहरीया पुचः उखे पाखे वनाः बेपत्ता जूपिनि माले ज्या सुरु याःगु दु ।