शहरीकरण विधेयक बारे नेवाः सचेतना
येँ (सन्ध्या टाइम्स) नेवाः जाग-रण माचं सरकारं संसदय् हःगु 'उपत्यका शहरीकरण विधेयक'यात कयाः छगू प्रशिक्षण-सचेतना ज्याझ्वः वंगु शुक्रवाः यात ।
ज्याझ्वलय् नेवाः जागरण माचया सल्लाहकार व नेवाः न्ह्यलुवा डा. महेशमान श्रेष्ठं सरकारं हयेत्यंगु शहरीकरण विधेयकयात कयाः नेवाःत सचेत जुइमाःगु खँ कनादिल ।
वय्कलं सरकारं बाहिरी चक्रपथ दयेकेगु नामं नेवाःतय्गु ७२ हजार रोपनी जग्गा लाका कायेत्यंगु व आः वयाः येँ यल ख्वपया जग्गा थःगु यकःति यानाः नेवाःतय् भूमि अतिक्रमण यायेत्यंगुलिं सकल नेवाःत मिले जुयाः शहरीकरण विधेयकया
विरोध यायेमाःगु बिचाः प्वंकादिल ।
ज्याझ्वलय् नेवाः जागरणया माचया संयोजक सुजीव बज्राचार्यं न्हूगु संविधान दयेकेत्यंगु इलय् नेवाःतय्त हे मन्यँसे हयेत्यंगु विधेयक सरकारं लित कायेमाःगु माग यासें यदि लित मकाल धाःसा कडा पलाः ल्ह्वनेत थःपिं बाध्य जुइगु ख्याच्वः बियादिल ।
ज्याझ्वलय् माचया सचिव विजयकृष्ण श्रेष्ठं विधेयक नेवाः भूमि विरोधी जूगु व सरकारं स्वनिगःया बुँ दलाली ज्या यानाः नयेत्यंगु बिचाः प्वंकुसें विधेयक लित कायेमाःगु बिचाः प्वंकादिल ।
प्रशिक्षण व सचेतना ज्याझ्वलय् माचया थीथी कचाया सछिम्ह दुजःतय्सं ब्वति काःगु खः ।
माचपाखें उगु विधेयकया विरोधय् चरणवद्ध ज्याझ्वः याना वनेगु ग्वसाः ग्वयातःगु दु । विधेयक लित कायेत इनाप यासें माचपाखें याकनं हे संविधानसभाया ६०१ म्ह सभासदतय्त ज्ञापनपत्र बीगु तयारी नं यानाच्वंगु दु ।
