'संविधान निर्माण मजूगुया दोषी सभामुख'
एनेकपा (माओवादी)या छ्याञ्जे सीपी गजुरेलं आः तक संविधान निर्माण यायेमफुगुया मुख्य दोषी सभामुख सुभाषचन्द्र नेम्वाङ जूगु द्वपं बियादीगु दु ।
संविधानसभाया विषयगत समितिं तयार याःगु प्रतिवेदन झिंस्वला तक सहलह यायेत मछ्वःगुलिं संविधान निर्माण जुइमफुगु द्वपं नेता गजुरेलं बियादिल । आइतवाः येँय् जूगु छगू साक्षात्कार ज्याझ्वलय् न्ववानादिसें वय्कलं झिंस्वला तक प्रतिवेदन थः थाय् तयातःम्ह सभामुख नेम्वाङ संविधान निर्माण मजूगुया जिम्मेवारी कायेमाःगु धयादिल ।
माओवादी वरिष्ठ न्वकु मोहन वैद्य 'किरण' पक्षधर गजुरेलं मन्त्रिपरिषदयात समावेशी मदयेकूसाः संसदीय दलया नेता हिलेगु ख्याच्वः बियादिल । माओवादी नायः पुष्पकमल दाहाल 'प्रचण्ड'यात लक्षित यानादिसें वय्कलं पार्टी नायः व संसदीय दलया नेता छम्ह हे जुइमाः धइगु नियम मदुगु धयादिल ।
माओवादीया १५९म्ह सभासद्तय् ल्हाःचिं दुगु प्रस्ताव कार्यान्वयन यायेमाःगु खँय् बः बियादिसें नेता गजुरेलं प्रचण्डं पार्टी दुनेया अर्न्तसंघर्ष व पिनेया वर्ग संघर्षयात गुकथंया नेतृत्व यानादी उकिया हे आधारय् नेतृत्व हिलेगु व महिलेगु खँ निर्भर जुइगु धयादिल ।
