जनजाति महासंघया महासचिव शेर्पायात ज्वन

सा स्याःगु अभियोगय् कुनातःपिंत नापलायेत वंगु इलय् नेपाल आदिवासी जनजाति महासंघया महासचिव आङ्काजी शेर्पायात नं प्रहरीं ज्वंगु दु ।

महासंघया नायः राजकुमार लेखीं थौं छगू विज्ञप्ति पिथनादिसें अभियुत्ततय्त नापलायेत वंगु इलय् बौद्ध प्रहरी ज्याकूथीं शेर्पायात ज्वंगु धासें उकिया भत्सना याःगु दु । विज्ञप्तिइ सरकारया थज्याःगु पागलपनपूर्ण ज्यां महासंघ स्तब्ध व आक्रोशित जूगु खँ न्ह्यथनातःगु दु ।

अथेहे विज्ञप्तिइ शेर्पायात ससम्मान तत्काल त्वःतेत व बिना कारण ज्वंपिं प्रहरीयात कारवाही यायेत नं माग याःगु दु । नापं महासंघं शेर्पायात तत्काल मत्वःतुसाः कडा प्रतिकार यायेगु ख्याच्वः तकं बिउगु दु ।

शनिवा: बहनी प्रहरीं येँया जोरपाटीइ सा स्याःगु अभियोगय् इन्द्रबहादुर तामाङ, चन्द्र बुढाथोकी, राजु लामा व दावा मोक्तानयात ज्वंगु खः ।