'प्रधानमन्त्रीं तत्काल राजीनामा बीमाः'
नेपाली कांग्रेसया शीर्ष नेतातय्सं प्रधानमन्त्रीया राजीनामा मुख्य विषय मखू धयाच्वंगु इलय् हे कांग्रेस केन्द्रीय दुजःतय्सं प्रधानमन्त्रीं तत्काल राजीनामा बीमाःगु माग याःगु दु ।
शनिवाः पार्टी ज्याकू सानेपाय् च्वंगु कांग्रेसया केन्द्रीय समितिया अनौपचारिक मुँज्याय् नेतातय्सं प्रधानमन्त्रीया राजीनामा माग याःगु खः । नेतातय्सं संविधानसभाया म्याद थप यायेगु इलय् जूगु न्यागू बुँदा कथं प्रधानमन्त्री राजीनामा बीमाःगु धासें उगु न्यागू बुँदा कार्यान्वनय् कांग्रेस शीर्ष नेतात हे जिम्मेवार मजूगु धासें नेतृत्वया कुंखिंगु खः ।
कांग्रेस उपसभापति रामचन्द्र पौडेलया अध्यताय् च्वंगु मुँज्याय् नेतातय्सं राष्ट्रिय सहमतिय सरकारया निंतिं प्रधानमन्त्रीं तत्काल राजीनामा बीमाःगु अडान पार्टीं कायेमाःगु बिचाः प्वंकूगु खः ।
अथेहे मुँज्याय् नेतातय्सं सहमतिइ बजेट हयेमाःगु धासें बजेट बारे पार्टीया आधिकारिक धारणा याकन क्वःछिइत माग याःगु खः । केन्द्रीय दुजःतय्सं बजेटयात समर्थन यायेगु वा सशक्त प्रतिकार यायेगु बारे निर्णय यायेत नेतृत्वयात दबाव बिउगु खः ।
News Location:
