'भदौ दुने हे संविधानया एकीकृत मस्यौदा'

उपराष्ट्रपति परमानन्द झां संविधानसभाया एकीकृत मस्यौदा वइगु भदौ दुने हे वइगु दावी यानादीगु दु । वय्कलं लिप्पांगु इलय् राजनीतिक दलत दथुइ सहमतिया वातावरण निर्माण जूगुलिं स्वलाया निंतिं संविधानसभाया म्याद थप याःगु इलय् हे एकीकृत मस्यौदा वइगु धयादिल ।

रिपोटर्स क्लब मकवानपुरं शनिवाः हेटौंडाय् याःगु साक्षात्कार ज्याझ्वलय् उपराष्ट्रपति झां शान्ति व संविधानया निंतिं आः सकारात्मक लसक ब्वलंगुलिं दलतय्त इमान्दार जुयाः ज्या यायेत इनाप यानादिल । वय्कलं राष्ट्रपति व उपराष्ट्रपति अभिभावक जक जूगुलिं देय्या भविष्य निर्धारण याइपिं राजनीतिक दलत हे जूगु धयादिल ।

न्हूगु नेपाः निर्माणया आधार संघीयता जूगु धयादिसें वय्कलं फुक्क नेपाःमि न्ह्य:नीगु कथंया संघीयताय् वनेमाःगु बिचा: प्वंकादिल ।