गणबहाल रेडक्रसया न्याक्वःगु साधारण सभा
येँ (सन्ध्या टाइम्स) नेपाल रेडक्रस सोसाइटी गणबहाल उपशाखाया न्याक्वःगु साधारण सभा आः नकतिनि थनया धरहरा पार्टी पालेसय् जुल ।
उपशाखाया सल्लाहकार राज काजी शाक्यं लसकुस यानादीगु उगु ज्याझ्वलय् नेपाल रेडक्रस सोसाइटीया केन्द्रीय महामन्त्री देवरत्न धाख्वा मूपाहां कथं झाःगु खःसा पाहां कथं येँ जिल्ला शाखाया नायः मुकुन्दबहादुर प्रधान व मन्त्री संघरत्न शाक्यिपंसं नं रेडक्रसं याना वयाच्वंगु थीथी गतिविधि बारे थःथःगु नुगः खँ प्वंकदीगु खः ।
उगु साधारण सभाय् थीथी उपशाखाया सभापतिपिंसं भिंतुना देछानादीगु खः ।
गणबहाल उपशाखाया सभापति अमृतनारायण मानन्धरया सभापतित्वय् जूगु ज्याझ्वलय् सचिव तेजनारायण मानन्धरं प्रगति प्रतिवेदन व कोषाध्यक्ष किशोर चुडामणि वज्राचार्यं आर्थिक प्रतिवेदन न्ह्यब्वयादीगु खः ।
