सरकार क्वःदलेवं तस्करी अप्वल

येँ (सन्ध्या टाइम्स) स्थानीय निकायं भन्सारय् गुगुं नं कथंया पंगः मथंगु अवस्थाय् तराई लागाय् तस्करी लाइन खुला जूगु दु । देशय् अने कथंया राजनीतिक समस्यात ब्वलनीगु इलय् तराईलय् च्वंगु भन्सार नाकाय् नं आर्थिक रुपं व्यापक चलखेल जुइगु ज्या न्हापा नं जुयाच्वंगु खःसा आः नं थज्याःगु चलखेल शुरु जूगु दु ।

माओवादी नेतृत्वया सरकार क्वःदलेवं देशय् राजनीतिक अस्थिरता ब्वलंगु दुसा भन्सारय् नं चोरी पैठारी गिरोह व तस्करी नियन्त्रण याइगु सरकारी निकायया दथुइ अघोषित सम्झौतां तस्कर लाइन खुला जुयाच्वंगु खँ सूत्रं
धाःगु दु ।
विशेष यानाः तराईया लागाया झापा मोरङ्ग सुनसरी सिराहा धनुषा महोत्तरी सर्लाही रौतहट
बारा पसा्र नवलपरासी रुपन्देही व नेपालगाजं निर्वाध रुपं भन्सार छले यानाः सामान हयेगु यानाच्वंगुलिं थौं कन्हय् अन राजश्व संकलन नं म्हो जुयाच्वंगु दु । थुकथं तस्करी लाइन चालीगु इलय् तस्करतय्सं थःपिंत वःगु लबः मध्ये २५ प्रतिशत ध्यबा जनपथ प्रहरी जिल्ला प्रशासन सशस्त्र प्रहरीया अधिकृत व राजनीतिक पार्टीया स्थानीय नेता लिसें पत्रकारतय्त नं भाग थ्याकेगु यानाच्वंगुलिं उगु खँ धाःसा पिहां मवइगु सूत्रं धाःगु दु । सूत्रया कथं तराई लागाया तस्करी लाइनयात समानान्तर भन्सार नं धायेगु यानाच्वंगु दावी दु ।

सूत्रया कथं न्हापा न्हापा तस्करी यानाहःगु सामान ज्वनेगु जुयाः भन्सारय् आपालं राजश्व उठे जुयाच्वंगु खः । तर थौंकन्हय् तस्करीया लाइन खुला रुपं चालाच्वंगुलिं भन्सारय् नं राजश्व तसकं म्हो जक उठे जुयाच्वंगु खँ धाःगु दु । तराईलय् भन्सार नाका तसकं कमे जुइगु नाका कथं नं कायेगु याः ।

उखे पसा्रय् भन्सार राजश्व ढुकुटी सुरक्षाया नितिं खटे जुयाच्वंम्ह राजश्व टोलीया निमित्त भन्सार इन्चार्ज प्रहरी हवल्दार हुसेन देवानं भन्सारया मू नाकां हे तस्करतय्त ग्वाहालि यानाच्वंगु खँ धयादीगु दु ।

हवल्दार देवानं वीरगाज भन्सार प्रमुख केवलप्रसाद भण्डारी सशस्त्र प्रहरी नायब उपरीक्षकया ग्वाहालिं हे तस्करीतय्त तःधंगु तिबः बियाच्वंगु खँ सीदुगु दु । हवल्दार देवानयात न्हिं झिंन्याद्वः निसें नीद्वः तक उठे यायेगु कथं तस्करी यायेत छुट बियाच्वंगु खँ धाःगु दु ।

हवल्दार देवानं वीरगाज भन्सारय् जक च्वनाः हे निगः टाटा सुमो गाडी न्यायेधुंकूगु खँ नं भन्सार सूत्रं धाःगु दु । हवल्दार देवानं डिआइजीयात लय् न्यय्द्वः एसएसपीयात सुइद्वः डिएसपीयात नीद्वः प्रहरी निरीक्षकयात झिद्वः तका ध्यबा बुझे याना वयाच्वंगु खँ नं उगु सूत्रं धाःगु दु ।