भदौ दुने निगः न्हूगु जहाज : पर्यटन मन्त्री
पर्यटन तथा नागरिक उड्यन मन्त्री खड्गबहादुर विश्वकर्मां वइगु भदौया दुने नेपाल वायु सेवा निगमया निंतिं निगः न्हूगु जहाज न्यायेगु तयारी जुयाच्वंगु खँ धयादीगु दु ।
रिपोटर्स क्बलं थौं येँय् याःगु छगू साक्षात्कार ज्याझ्वलय् मन्त्री विश्वकर्मां जहाज न्यायेत थःम्हं अर्थ मन्त्रालय, राजनीतिक दलत व सम्बन्धित निकायलय् सहलह यायेधुंकूगु जानकारी बियादिसें मेगू मन्त्रिपरिषदया मुँज्याय् थुगु विषय प्रस्ताव यायेगु धयादिल ।
वय्कलं वायु सेवा निगम दुने माफिया व दलाल प्रवित्ति हावि जूगु धयादिसें छवाःया दुने सञ्चालक समिति भंग यायेगु धयादिल । अज्याःपिं हे माफिया व दलालतय् हुनिं वायु सेवा निगमं प्रगति यायेमफुगु दावी यानादिसें वय्कलं निगम दुने हिउपा हयेत सञ्चालक समिति भंग यायेमाःगु धयादिल ।
नेपाः पर्यटन वर्षय् फयां फक्व यक्व पर्यटकतय्त हयेत सरकारं कुतः यानाच्वंगु जानकारी बियादिसें मन्त्री विश्वकर्मां वंगु खुलाया दुने नेपाः वःपिं पर्यटकतय् ल्याः २६ प्रतिशतं अप्वःगु दावी यानादिल । नेपाःया छगू जक अन्तराष्ट्रिय विमानस्थलया रनवे स्यंगु विषयलय् छानबिन यानाः दोषीयात कारवाही यायेगु प्रतिबद्धता नं वय्कलं प्वंकादिल ।
