आतंकवाद लगानी नियन्त्रण महासन्धी संसदय् न्ह्यब्वल
उपप्रधान नापं अर्थमन्त्री भरतमोहन अधिकारीं व्यवस्थापिका संसदय् आतंकवादय् लगानी यायेगु ज्या नियन्त्रण यायेगु अन्तरराष्ट्रिय महासन्धि न्ह्यब्वयादीगु दु । संसदय् महासन्धि न्ह्यब्वयादिसें मन्त्री अधिकारीं विश्वव्यापीरुपय् आपराधिक घटनायात निरुत्साहन यायेत उगु महासन्धि नेपालं पारित यायेमाःगु धयादिल ।
वय्कलं अन्तरराष्ट्रिय जगतया ग्वाहालि, सहकार्य व सूचना आदानप्रदान अप्वइगु जूगुलिं उगु महासन्धिया नेपाः नं पक्ष राष्ट्र जुइ आवश्यक जूगु धयादिल । वय्कलं राजनीतिक गतिविधियात आतंकादी घटनाक्रम नाप स्वायेमजिउगु नं स्पष्ट यानादिल ।
अर्थमन्त्रीं न्ह्यब्वयादीगु महसन्धि सम्बन्धी विधेयकयात कयाः कांग्रेसया डा. रामशरण महत व रमेश लेखक, एमालेया अग्नी खरेल व सपना मल्ल प्रधान, माओवादीया खिमलाला देवकोटा व एकराज भण्डारी, नेमकिपाया सुनिल प्रजापति लगायतं न्ववानादीगु खः ।
उगु हे संसद मुँज्याय् अर्थमन्त्री अधिकारीं बहुराष्ट्रिय संगठित अपराध विरुद्धया संयुक्त राष्ट्रसंघीय महासन्धिइ सामान्य सहलह यायेगु प्रस्ताव नं न्ह्यब्वयादीगु खः । उगु प्रस्तावय् जूगु सहलहसं थीथी दलया सभासद्तय्सं ब्वति काःगु खः ।
