संविधान च्वज्या छखे लाःगुलिं चिन्ता
येँ (सन्ध्या टाइम्स) नेवाः देय् दबू लगायत देय्या थीथी १७ गू जातीय सामाजिक गैरसरकारी संस्थातय्सं संविधानसभाया अध्यक्ष सुभाष नेम्बाङयात छगू ज्ञापनपत्र लःल्हासें देशय् राजनीतिक पार्टीतय्सं संविधान दयेकेगु ज्यायात त्वःताः सत्ता समीकरणपाखे अप्वः ध्यान बियाच्वंगु खँय् चिउताः प्वंकूगु दु ।
१७ गू संस्थाया प्रतिनिधित्व यासें नेवाः देय् दबूया नायः नरेश ताम्रकारं उगु ज्ञापनपत्र लःल्हानादीगु खः । ज्ञापनपत्रपाखें सकारात्मक पलाः ल्ह्वंगु दु धासें अध्यक्ष नेम्बाङ्गं वर्तमान राजनीतिक गतिरोधयात कयाः चिन्ता प्वंकाः संविधान निर्माण प्रक्रियाय् थुज्वःगु कथंया अन्यौलतां छुं नं कथंया लिच्वः मलाकेगु लागिं माक्व कुतः जुयाच्वंगु खँ कनादिल ।
संविधानसभा समितित थःथःगु जिम्मेवारी वहन यासें कार्यरत जुयाच्वंगु व थ्वहे वइगु असार ८ व ९ गते संविधानया अवधारणा आमजनताया दथुइ न्ह्यब्वयेगु प्रतिवद्धता नं अध्यक्ष नेम्बाङ्गं प्वंकादिल । थुकिया लागिं नागरिक समाजया प्रतिनिधि व आम नागरिकया ग्वाहालिया लागिं नं वय्कलं सकसितं अपिल यानादिल ।
ज्ञापनपत्रय् न्हूगु संविधानपाखें देय्या सकलें उत्पीडित आदिवासी जनजाति दलित अपांग मिसा आदि समुदायं न्हूगु नेपाः स्वये खनी धकाः आशा यानाच्वंगु इलय् सकलें राजनीतिक पार्टीत संविधान दयेकेगु ज्यायात छखे त्वःताः सत्ता समीकरणया फोहोरी कासाय् लगे जुयाच्वंगुगिं संविधान निर्माणया ज्यायात सही ट्राय्कय् हयेगु नितिं अध्यक्षं हे सक्रिय भूमिका म्हितेत इनाप यानातःगु दु ।
