'दोषी जूसाः सिटौलायात नं कानूनी कठघराय् हयेमाः'

नेपाली कांग्रेसया युवा नेता गगन थापां सुडान घोटालाय् दोषी खनेदुसाः थःगु पार्टीया महामन्त्री कृष्णप्रसाद सिटौलायात नं कानूनी कठघराय् हयेमाःगु खँ धयादीगु दु । वय्कलं सुडान घोटाला प्रकरणया अभियुक्ततय्त छुं नं हालतं उन्मुक्ति बीमज्यूगु धयादिल ।

रिपोटर्स क्लबं बुधवाः याःगु साक्षात्कार ज्याझ्वलय् नेता थापां अपराध व अपराधीतय् छुं नं जात व पार्टी मदइगु धयादिसें यदि थःगु हे पार्टीया नेतायात बचे यायेत स्वःसा थःम्ह पार्टी दुने उकिया प्रतिबाद यायेगु धयादिल । वय्कलं दोषी ठहर जूपिंत उन्मुक्ति बिउसाः दण्डहीनता अप्वइगु नं धयादिल ।

पार्टी दुने अप्वयावंगु गुटबन्दीया सिकार युवा संगठनत नं जूगु धयादिसें वय्कलं युवात थज्याःगु गुटपाखें पिहांमवयेकं समस्या समाधान मजुइगु दावी यानादिल ।