'आः संसद अवरुद्ध यानामच्वंसां जिल’
येँ (सन्ध्या टाइम्स) संसद न्ह्यायेवं हे राष्ट्रपितं ल्ह्वंगु पलाःया बारे हे सहलह जुइगु सहमति जुइधुंकूगु कारणं आः माओवादीं राष्ट्रपतिया पलाःयात कयाः सदन अवरुद्ध यानाच्वने माःगु अवस्था मदुगु खँ सभामुख सुभाष नेम्वाङ्गं धयादीगु दु । थौं सुथय् पोखरा विमानस्थलय् पत्रकारतलिसे खँ ल्हासें वय्कलं उगु बिचाः प्वंकादीगु खः ।
वय्कलं काम चलाउ सरकार ताः ई तक न्ह्याके मजिउ धासें थुकिं बजेट निर्माण व विकास निर्माणया ज्याय् तकं लिच्वः लाकीगु खतरा दु धयादिल ।
माओवादीपाखें सदन अवरुद्ध यानाः न्हूगु सरकार गठनया ज्याय् पंगः थनाच्वंगु कारणं उकिया समाधान मालेगु लागिं सभामुख नेम्बाङ्गं थौंकन्हय् थःहे सक्रिरय जुयाच्वनादीगु दु । थ्व झ्वलय् वय्कलं फुक्कं दलया नेतातय्त सःताः खँल्हाबल्हा यानादीगु खः ।
