एमालें माओवादीया प्रतिकार याइगु
नेकपा (एमाले)या अध्यक्ष झलनाथ खनालं माओवादी आपराधिक क्रियाकलापया विरुद्ध प्रतिकार यायेगु ख्याच्वः बियादीगु दु ।
येँय् एमाले निकट अखिल नेपाल महिला संघया मंगलवाः निसें न्ह्याःगु भेलायात सम्बोधन यासें अध्यक्ष खनालं आपराधिक क्रियाकलापया वैचारिक रुपं प्रतिकार यायेगु ख्याच्वः बियादीगु खः । माओवादीयात निशस्त्रीकरण यायेमफुसाः देय् द्वन्द्वय् फसेजुइगु धासें अध्यक्ष खनालं उग्रवामपन्थि व दक्षिणपन्थीत नाप सचेत जुइमाः धयादिल । वयेकलं एमाले नेतृत्वया सरकारय् माओवादीयात नं दुथ्याकेगु कुतः जुयाच्वंगु खँ धयादिल ।
अथेहे, वहे ज्याझ्वलय् एमालेया प्रभावशाली नेता केपि ओलीं माओवादीं संसदय् हेयेत्यंगु असंवैधानिक संकल्प प्रस्ताव पेश यायेमबीगु धयादिल । वयेकलं संकल्प प्रस्ताव हेयेगु धकाः माओवादी राष्ट्रपतियात विवादय् साचेत स्वःगु व राजनीतिइ सालेत स्वःगु द्वपं बियादिल । एमाले नेतृत्वया सरकार गठन जुइमबीत माओवादीं कुतः यानाच्वंगु द्वपं बियादिसें नेता ओलीं न्ह्याथे यानाः जुसां सरकार गठन जुइ धयादिल ।
