सर्वोच्चं मन्त्री सापकोटा विरुद्ध अन्तरिम आदेश जारी मयात
सर्वोच्च अदालतं सूचना व संचार मन्त्री अग्नी सापकोटा विरुद्ध लाःगु रिटय् अन्तरिम आदेश जारी यायेम्वाःगु निर्णय न्यंकूगु दु ।
अदालतया न्यायधीसत रामकुमार साह व प्रकाश वस्तीया मंकाः इजलासं मंगलवाः आदेश जारी यासें सुनां हत्याया अभियोग लगे यायेवं पदय् च्वनेगु अधिकारपाखें वञ्चित यायेमज्यूगु खँ न्ह्यथंगु दु । आदेशय् हत्याया अभियोग लगे जूगु अवस्थाय् मन्त्री पदय् बहल जुइगु वा मजुइगु धइगु खँ गनं नं न्ह्यथनामतःगुलिं अन्तरिम आदेश जारी यायेम्वाःगु खँ न्ह्यथनातःगु दु ।
अथेहे सर्वोच्चं महान्यायाधिवक्तया ज्याकूयात मन्त्री सापकोटाया मुद्दाया प्रगतिया बारे प्रत्येक झिन्यान्हुइ अदालतयात जानकारी यायेत नं आदेश बिउगु दु ।
सापकोटा मन्त्री बहल जुइवं मावअधिकारकर्मी सुशील प्याकुरेल, मन्दिरा शर्मा व पत्रकार कणकमणि दिक्षितं हत्याया अभियोग लगे जुयाच्वम्ह सापकोटायात मन्त्री पदं बर्खास्ता यायेमाःगु माग यासें सर्वोच्चय् रिट दायर याःगु खः ।
२०६२ साल असार ८ गते काभ्रेपलाञ्चोक जिल्ला छत्रेबास-५या अर्जुन लामायात अपहरण लिपा मन्त्री सापकोटाया निर्देशनय् स्याःगु द्वपं लानाच्वंगु दु ।
