एमालेया निगू विद्यार्थी गुट दथुइ ल्वापु, खुम्ह घाःपाः

येँया लैनचौरय् च्वंगु अमृत साइन्स क्याम्पसय् सत्तारुढ नेकपा (एमाले)या निगू विद्यार्थी गुट दथुइ मंगलवाः न्हिनय् ल्वापु जूगु दु । एमालेया भातृ संगठन अनेरास्ववियू आवद्ध केपी ओली पक्ष व झलनाथ खनाल पक्ष दथुइ ल्वापु जुया खुम्ह घाःपाः जूगु दु । घाःपाः जूपिंत मनमोहन मेमोरियल अस्पतालय् वासः याकातःगु दु ।

ओली पक्षया अनेरास्ववियूया विद्यार्थीतय्सं ग्वसाःग्वःगु लसकुस ज्याझ्वलय् खनाल पक्षया विद्यार्थीतय्सं अवरोध थनेवं ल्वापु सुरु जूगु खँ धाःगु दु । खनाल पक्षया विद्यार्थीतय्सं ज्याझ्वलय् मूपाँहा कथं ब्वति कायेत झाम्ह एमाले नेता प्रदिप ज्ञावालीया गाडी तकं तोडफोड याना बिउगु खः । नेता ज्ञवालीया बा. १. च. ६८६५ नम्बरया गाडीइ तोडफोड यायेवं प्रहरीं वय्कःयात सुरक्षित थासय् यंकूगु खः ।