सत्यमोहन जोशीयात मानार्थ महाविद्यावारिधि
काठमाडौं विश्वविद्यालयं संस्कृतिविद्ध सत्यमोहन जोशीयात मानार्थ महाविद्यावारिधिया उपाधि बीगु निर्णय याःगु दु ।
विश्वविद्यालयया ५५क्वःगु मुँज्यां जोशीयात उगु उपाधि बीगु निर्णय याःगु खः । विश्वविद्यालयया सहकुलपति नापं शिक्षामन्त्री गंगालाल तुलाधरया अध्यक्षताय् आइतवाः च्वंगु मुँज्याय् विश्वविद्यालयया रजिष्ट्रार डा. भद्रमान तुलाधरं विद्यावारिधि बीगु प्रस्ताव न्ह्यब्वयादीगु खःसां मुँज्यां वय्कःयात महाविद्यावारिधि बीगु निर्णय याःगु खः ।
नेपाल प्रज्ञा प्रतिष्ठानया आजीवन दुजः नापं नेपालभाषा एकादेमीया चान्सलर जोशीं देय्या भाय्, संस्कृति व इतिहासया क्षेत्रय् अतुलनीय योगदान याःगु बापत वय्क:यात उगु उपाधिपाखें सम्मान यायेत्यंगु खः ।
काठमाडौं विश्वविद्यालयं थःगु स्थपनाया नीदँया दुने महाविद्यावारिधि बीत्यंगु थ्व न्हापांगु खुसी खः । याकन हे छगू भव्य ज्याझ्वःया दथुइ जोशीयात लःल्हयेत्यंगु महाविध्यावारिधिया उपाधि विश्वविद्यालयं लःल्हाइगु सर्वोच्च सम्मान खः ।
