'भदौ १४ य् नं संविधान मवःसा न्हूगु हे चुनाव'
येँ (सन्ध्या टाइम्स)/यदि आः वइगु भदौ १४ गते तक नं न्हूगु संविधान जारी याये मफुत धाःसा संविधानसभा विघटन यानाः न्हूगु हे चुनाव यायेमाःगु खँ नेपाली कांग्रेसया केन्द्रीय कोषाध्यक्ष व पुलांम्ह उपसभामुख चित्रलेखा यादवं धयादीगु दु। म्याग्दी जिल्लाय् प्रेस युनियनं याःगु छगू ज्याझ्वलय् न्ववासें वय्कलं थ्व बिचाः प्वंकादीगु खः ।
'संविधानसभाया आयु निरर्थक कारण क्यनाः ताःहाकः याना तयेगु ज्यां देशय् अन्यौलता जक ब्वलंकेगु ज्या जुइ' वय्कलं धयादिल ।
संविधानसभाया म्याद निक्वःगु खुसी थपे यानाः नं यदि न्हूगु संविधान वये मफुत धाःसा वयां लिपा नेपालं कांग्रेस आन्दोलनय् वनीगु खँ नं वय्कलं कनादिल। अबलय्या लागिं कांग्रेसं आन्दोलनया तयारी समेत यायेधुंकूगु दावी नं मय्जु यादवं यानादिल ।
अथे हे सेना समायोजनया खँय् नं संख्याय् स्वयां मोडालिटी व मापदण्डय् विवाद जुयाच्वंगु खः धासें वयक्लं मापदण्ड दुने लाःपिं माओवादी लडाकुयात समायोजन यायेमाः धइगु कांग्रेस दुगु खँ नं वय्कलं कनादिल। वय्कलं धयादिल, 'तर एमाओवादीं सरकारयात ल्वाभः बुझे मयाःतले सेना समायोजन धाःसा जुइ फइ मखु ।'
एमाओवादीं मापदण्डं पिनेयापिं लडाकुतय्त नं समायोजन यायेत स्वःगु कारणं समायोजनया ज्या न्ह्यःने न्ह्याये मफुगु खः धासें वय्कलं प्रधानमन्त्री गुलि फु उलि याकनं राजीनामा बीमाःगु माग नं यानादिल ।
