सरकार गठन बारे कोइराला व नेपाल दथुइ सहलह
न्हूगु सरकार गठन यायेत संसदया गतिरोध अन्त्य यायेगु सम्बन्धय् नेपाली कांग्रेसया सभापति गिरिजाप्रसाद कोइराला व प्रधानमन्त्रीया कथं प्रस्तावित नेकपा एमालेया नेता माधवकुमार नेपाल दुथुइ सहलह जूगु दु ।
कोइराला निवास महाराजगंजय् जूगु सहलहलय् निम्ह शीर्ष नेतात लगायत कानुनविदतय्सं नं ब्वति काःगु खः । संसदय् राष्ट्रपति विरुद्ध संकल्प प्रस्ताव पारित यायेगु माओवादी प्रस्तावया खँय् कानुनविदतनाप नेतातय्सं सहलह याःगु खः । सहलहलय् ब्वति कयादिम्ह कानुनविद हरिहर दाहालया कथं कानुनविदतय्सं माओवादी प्रस्ताव असंवैधानिक जुइगु सल्लाह ब्यूगु धयादिल ।
सहलहलय् कांग्रेस नेता शेरबहादुर देउवा, विमलेन्द्र निधि, एमालेया पाखें अग्नि खरेल नापं कानुनविदत राधेश्याम अधिकारी, हरिहर दाहाल लगायतं ब्वति काःगु खः । सहलहलिपा एमालेया नेतातय्सं छुं प्रतिक्रिया बियामदी ।
