कार्यदलं 'फ्रेन्च मोडल'या प्रस्ताव न्ह्यब्वइगु
संविधानय् खनेदुगु विवाद समाधान उपसमितिं नीस्वंगु कार्यदलं नेपाःया न्हूगु शासकीय स्वरुपय् 'फ्रेन्च मोडल'या अवधारणा तयार याःगु दु । 'फ्रेन्च मोडल' कथं जनतापाखें प्रत्यक्ष निर्वाचित राष्ट्रपति व संसदपाखें निर्वाचित प्रधानमन्त्रीया जुइगु व्यवस्थाय् राष्ट्रपति व प्रधानमन्त्री निम्हेसियां कार्यकारी अधिकार बाँडफाँट जुइ ।
सद्भावना पार्टीया नेता लक्ष्मणलाल कर्णया संयोजकत्वय् नीस्वंगु कार्यदलया थौं च्वंगु मुँज्याय् शासकीय स्वरुपया अवधारणया बारे फुक्कसितं मान्य जुइ कथं 'फ्रेन्च मोडल'या प्रस्ताव तयार याःगु खः । थ्वस्वयां न्ह्यः दकलय् न्हापां प्रमुख स्वंगू दलया मुँज्याय् एमालें 'फ्रेन्च मोडल'या प्रस्ताव याःगु खः ।
कार्यदलया मुँज्याय् माओवादी, कांग्रेस व एमालें शासकीय स्वरुपया थःथःगु हे मोडल प्रस्ताव याःसां कार्यदलं दक्वसित मिले यानाः न्हूगु प्रस्ताव तयार याःगु खः । माओवादीं कार्यकारी अधिकार दुगु प्रत्यक्ष निर्वाचित राष्ट्रपति, कांग्रेसं आलंकारिक राष्ट्रपति व संसदं निर्वाचित प्रधानमन्त्री व एमालें प्रत्यक्ष निर्वाचित प्रधानमन्त्रीया प्रस्ताव न्ह्यब्वःगु खः ।
न्हय्न्हुया जक ई दुगु कार्यदलया म्याद थौं क्वचायेत्यंगु दु । कार्यदलं आः विवाद समाधान उपसमितियात मुँज्याय् थःपिंसं तयार याःगु प्रस्ताव न्ह्यब्वइ । थ्वस्वयां न्ह्यः कार्यदलं राज्य पुनर्संरचना व राज्य शक्तिया बाँडफाँड समितिं तयार याःगु प्रस्तावय् सहलह यानाः उकि कायम ७८ विवादयात २५बुँदाय् क्वकाःगु खः ।
