राष्ट्रपतिया मुद्दायात सदनतय् प्राथमिकता : सभामुख
सभामुख सुवाषचन्द्र नेम्वाङं राष्ट्रपतिया मुद्दायात सदनय् न्हापांगु प्राथमिकता बीइगु जूगुलिं माओवादीं संसद अवरुद्ध यानाच्वनेगुया छुं अर्थ मदु धयादिल ।
पोखरा विमानस्थलय् मंगलवाः पत्रकारत नाप खँल्हानादिसें सभामुख नेम्वाङं संसद सुचारु यायेधुंकाः राष्ट्रपतिया पला:या बारे व्यापक सहलह लिपाः जक सरकार चयन प्रक्रिया न्ह्यावनीगु जूगुलिं सदन सुचारु यायेगु वातावरण मिले यायेत माओवादीयात इनाप यानादीगु दु ।
वयेकलं प्रधानमन्त्री चयनया निंतिं व्यवस्थापिका संसद स्वयां पिने विकल्प मालेमज्यूगु खँय् बः बियादिल । वयेकलं प्रधानमन्त्री संसदया नेता नं जूगुलिं प्रधानमन्त्री चयनया निंतिं संसद छगू जक विकल्प जूगु धयादिल ।
काम चलाउ सरकार तःहाकःगु ई तक न्ह्यानाच्वंसाः बजेट व सरकारया नीति व कार्यक्रम छके लायेफूगुलिं उकी पाखे दलत जिम्मेवार जुया न्ह्याः वनेत सभामुख नेम्वाङं इनाप यानादिल ।
