'वामपन्थीतय्त छप्पँ जुइ मबीत माधव नेपालयात प्रधानमन्त्री देयेकेगु कुत:'
एकीकृत नेकपा (माओवादी)या विदेश विभाग प्रमुख सीपि गजुरेलं वामपन्थीतय्त छप्पँ जुइ मबीत भारतं माधव नेपालयात प्रधानमन्त्री देयेकेत्यंगु खँ धयादीगु दु ।
सोमवाः नेपालगंजय् पत्रकारत नाप खँल्हानादिसें वयेकलं भारतया आडय् माधव नेपाल प्रधानमन्त्री जुसां लिपाः एमाले व नेपाल स्वयमं द्वंकूगु चायेकीगु खँ धयादीगु दु । वयेकलं मधेशी जनअधिकार फोरमया अध्यक्ष उपेन्द्र यादवयात प्रधानमन्त्री देयेकाः विदेशी हस्तक्षेपं बचे यायेत स्वयाःगु तर विदेशी रिमोट कन्ट्रोलं यादव प्रधानमन्त्री जुइगु प्रक्रिया दिकेत स्वःगु द्वपं बियादिल । वयेकलं थ्व ज्या दिकेत विदेशीतय् ल्यूल्यू वनाच्वंगु दलत लगेजुयाच्वंगु धयादिल ।
नेता गजुरेलं माओवादीयात सरकार त्वतेमाःगुलिं छुं फरक मजूगु धासें थुकीयात अवसरया कथं कयाः सदन व सतकं संघर्ष यानाः क्रान्ति पुवंकेगु चेतावनी बियादिल । वयेकलं देशय् सुं मेम्ह मनू मदुथें यानाः निगू निर्वाचन क्षेत्रं बुम्ह माधव नेपालयात प्रधानमन्त्री देयेत्यंगु धयादिल । वयेकलं थुकीं जनमतया छुं अर्थ मदइगु जिकीर यानादिल ।
माओवादी सचिवालयया दुजः नं जुयादिम्ह गजुरेलं आःया आवश्यकता गणतन्त्रया सुरक्षा यायेगु व शान्ति प्रक्रियायात तार्किक निष्कर्षय् थ्यंकेगु जुसां विदेशी हस्तक्षेपया कारण दलतय्सं दक्वं ल्वमंकाः अप्राकृतिक गठबन्ध याःगु द्वपं बियादिल । माओवादीया न्ह्याक्व: गलत प्रचार यासां आः जंगल लिहांवनेगु पक्षय् माओवादी मदुगु धासें नेता गजुरेलं थंज्याःगु हल्लां जनता ग्याय् म्वा धयादिल ।
