पार्टीं कारवाही यासाः सामना यायेत तयार : गच्छदार
मधेशी जनअधिकार फोरमया नेता विजयकुमार गच्छादारं पार्टीं थःयात कारवाही यासाः उकीया सामना यायेत तयार जूगु खँ धयादीगु दु ।
सोमवाः रिपोटस्र क्वबय् याःगु साक्षात्कार ज्याझ्वलय् वयेकलं पार्टीं थःयात कारवाही यायेगु स्वयां पार्टी नेतृत्वं द्वंकूगु ज्या भिंकेगु पाखे कुतः यायेमाः धयादिल ।
संसदीय दलया बहुमत दुजःतय्सं याःगु निर्णय कथं थः स्वयमया नेतृत्वय् फोरम सरकारय् ब्वति कायेगु धासें वयेकलं निर्णयलय् छुं ह्यूपाः मवइगु खँ धयादिल । पार्टी नेतृत्वं फोरमया संसदीय दलयात बेवास्ता याःगु कारणं हे पार्टी थ्व अवस्थाय् वःगु धासें वयेकलं पार्टी नेतृत्व उकी गम्भीर जुइमाः धयादिल । वयेकलं संसदीय दलया निर्णययात केन्द्रीय समितिं पारित मयासाः विशेष महाधिवेशन सःताः अध्यक्ष उपेन्द्र यादवयात चीकेगु ख्याःच्वः तकं बियादिल । पार्टी अध्यक्ष यादव साम्यवादी दर्शनपाखें प्रभावित जूगुलिं विकल्प मालेमालिगु अवस्था नं वयेफू धासें नेता गच्छदारं पार्टीइ साम्यवादी दर्शनया अन्त्य मजूसाः फोरमया भविष्य मदइगु तर्क तयादिल ।
