सेना समायोजनया विषयलय् खँ मिलेमजुल
सेना समायोजनया मोडालिटी बारे दलत दथुइ सहमति जुइमफयेवं प्रमुख स्वंगू दलया मुँज्या निष्कर्ष विहीन जूगु दु ।
प्रधानमन्त्री झलनाथ खनालं आव्हान यानादीगु मुँज्याय् एनेकपा (माओवादी) व नेपाली कांग्रेसं समायोजनया मोडालिटीबारे थःथःगु अडान कायेवं सहमति जुइमफुगु खः । माओवादीं समायोजनया न्हूगु मोडल दयेकेमाःगु प्रस्ताव याःगु खःसा कांग्रेसं धाःसा शान्ति सम्झौता कथं हे समायोजन यायेमाःगु अडान काःगु खः ।
कांग्रेस सभापति सुशील कोइराला अमेरिका प्रस्थान याये न्ह्यः प्रधानमन्त्री निवास बालुवाटारय् च्वंगु स्वंगु दलया मुँज्यां सहमति यायेमफुसां शान्ति प्रक्रिया क्वचायेकेत सहलहयात तीव्रता बीगु सहमति या:गु दु । राजनीतिक गतिरोध अझ नं ज्यंकेमफुगुलिं दलतय्सं औपचारिक/अनौपचारिक सहलह यायेगु निर्णय नं मुँज्यां याःगु दु ।
थ्वस्वयां न्ह्यः स्वंगू दलया नेतातय्सं सेना समायोजनया मोडालिटी बारे दलत सहमति नापसं थ्यंगु व समायोजन जुइपिनि ल्याखय् जक सहमति जुइमानीगु खँ धयाच्वंगु खः । तर थौंया मुँज्याय् दलत दथुइ मोडालिटीया बारे हे सहमति जुइमफुनीगु खनेदत ।
थौंया मुँज्याय् एमाओवादी नाय: पुष्पकमल दाहाल 'प्रचण्ड', वरिष्ठ न्वकु मोहन वैद्य 'किरण' व मेम्ह न्वकु नारायणकाजी श्रेष्ठ 'प्रकाश'या ब्वति दुगु खःसा कांग्रेसपाखें सभापति सुशील कोइराला, उपसभापति रामचन्द्र पौडेल व नेता रामशरण महतया ब्वति दुगु खः । अथेहे एमालेपाखें पार्टी नायः नापं प्रधानमन्त्री झलनाथ खनाल, न्वकु बामदेव गौतम व मूछ्याञ्जे ईश्वर पोखरेलया ब्वति दुगु खः ।
News Location:
