आरोही महर्जनयात नागरिक अभिनन्दन
हलिंया दक्कलय् तःजाःगु च्वापुगुँ सगरमाथाय् थ्यंकादीम्ह सन्तकुमार महर्जनयात छगू ज्याझ्वःया दथुइ नागरिक अभिनन्दन यात ।
किपूया तःगवपि जूगु उगु अभिनन्दन ज्याझ्वलय् एकिकृत नेकपा माओवादीया सभासद दीलिप महर्जनं भाजु सन्तकुमार महर्जनयात सिजः पौ व नीन्याद्वः तका लःल्हानादिल । नागरिक अभिनन्दन मूल समारोह समितिया कजि प्रदीप महर्जनया सभाध्यक्षय् जूगु उगु ज्याझ्वलय् किपू नगरपालिकाया कार्यकारी अधिकृत अंजन कुमार न्यौपानें नं न्ववानादीगु खः ।
किपूया तःगवपिइ अभिनन्दन ज्याझ्वः याये न्हयः आरोही सन्तकुमार महर्जन लिसें समल, द्यःध्वाखा, न्हूबजाः, पांगा, भाजंगाः, च्वबाहाः, क्वय्ना, टौदह, लनगोल, भत्क्यापाटी, गाम्चा, धःपाः जुयाः गणतान्त्रिक चुकतक मोटर साइकल राय्लि याःगु खःसा अनं चिथु बिहार, इटाछेँ, बाघभैरव, चाफः, कुतुझ्वः जुयाः तःगवपि तक परम्परागत तथा साँस्कृतिक बाजंलिसें पैदल यात्रा पिदंगु खः । अभिनन्दन ज्याझ्वः लिपा साँस्कृतिक ज्याझवः नं जूगु खः ।
भाजु सन्तकुमार महर्जन निजामति कर्मचारीया सगरमाथा आरोहण पुचःपाखें जेष्ठ ४ गते सुथसिया ५:२० ताः इलय् सगरमाथाया च्वकाय् थ्यंकादीगु खः ।
