लोकतान्त्रिक संविधानया लागि शान्ति प्रकृया निष्कर्षय् थ्यंकेमाःगु

नेकपा एमालेया मू छ्यांजे ईश्वर पोखरेलं शान्ति प्रकृया निष्कर्षय् मथ्यंतलय् लोकतान्त्रिक संविधान दयेके मफइगु खँ धयादिल ।

एमाले मेची सम्पर्क समिितं थौं येँय् ग्वसाः ग्वःगु कार्यकर्ता प्रशिक्षण ज्याझ्वलय् न्ववानादिसें मू छयांजे पोखरेलं माओवादी लडाकुया समायोजन व ल्वाभः व्यवस्थापन मजुइकं संविधान दयेके मफइगु खँ न्ह्यथनादिल ।

वय्कलं नेपाली कांग्रेस व माओवादीयात मिले यानाः न्ह्यःने यंकेगु जिम्मेवारी एमालेया ब्वहलय् वःगु धयादिसें माओवादीयात मिखा तिसिनाः समर्थन याःसा न्हूगु जनवाद वइ धइगु भ्रमय् मच्वनेत नं नेता व कार्यकर्तातय्त सुझाव बियादिल ।

शान्ति प्रकृया व संविधानया खँय् माओवादी गम्भिर मजूगु द्वपं बियादिसें मापदण्ड पूवंकूपिं माओवादी लडाकुतय्त जक नेपाली सेनाय् समायोजन यायेफइगु स्पष्ट यानादिल ।