'अपराधीयात संरक्षण याइपिंत नं कारवाही यायेमाः'
नेकपा (एमाले)या न्वकु बामदेव गौतमं पत्रकारतय्त आक्रमण याइपिंत कारवाही यायेत थःगु पार्टी प्रतिबद्ध दुगु खँ धयादीगु दु । वय्कलं पार्टीया ध्वाँय् ज्वना छथ्व अपराधीक पुचःत सुलाच्वंगु स्वीकार यानादिसें अज्याःपिं तःन्हु सुलेमफइगु दावी यानादिल ।
विराटनगर विमानस्थलय् पत्रकारतनाप खँल्हाबंला यानादिसें नेता गौतमं पार्टी दुने दुगु अपराधीक मनोवृत्तीयात समाप्त यायेमफुसाः पार्टी हे समाप्त जुइगु तकं धयादिल । न्ह्यागु पार्टीया मनू जूसां अपराध याइपिंत कानूनी तरिकां सजाय बीमाःगु धयादिसें वय्कलं पार्टी दुने सुला अपराध याइपिंत पार्टीं हे कानूनया दायराय् हयेमाःगु धयादिल ।
युवा संघया अध्यक्ष महेश बस्नेत प्रति लक्षित यानादिसें नेता गौतमं अपराधीयात सुनां थःनाप दु धकाः संरक्षण बिउसाः वयात नं कारवाही यायेमाःगु धयादिल । जेलं त्वःतुसां थः छुटे जुइत अस्वीकार याःम्ह बस्नेतं पार्टीया अवहेलना याःगु धयादिसें वय्कलं बस्नेतयात पार्टीं कारवाही याइगु धयादिल ।
