थनिंनिसें झिंछक्वःगु राष्ट्रिय जनगणना न्ह्यात
थनिंनिसें झिंछक्वःगु राष्ट्रिय जनगणना सुरु जूगु दु । 'सुं हे त्वःमफीमाः, सुं हे दोहोरे मजुइमाः' धइगु नारा थ्वयेकाः थुगुसीयात जनगणना सुरु जूगु खः । केन्द्रीय तथ्याङ्क विभागं राष्ट्रपति डा. रामवरण यादव व वय्कःया छेँजःया तथ्याङ्क संकलन यानाः विधिवत रुपं जनगणना न्ह्याकूगु खः ।
तथ्याङ्क विभागं जनगणनाया निंतिं ८ हजार ५ सय सुपरिवेक्षक व ३४ हजार गणकतय्त खटे याःगु दु । जनगणना प्रयोजनया निंतिं देय्न्यंक ८०गू जिल्ला ज्याकू व ३ सय ५० इलाका ज्याकू स्थापना याःगु दु ।
जनगणनाया निंतिं प्रत्येक छेँजःयात ५०गू न्ह्यसः न्यनीगु व उगु लगत भरे यायेत ३० मिनेट स्वयां अप्व ई मालीगु अनुमान तथ्याङ्क विभागं याःगु दु ।
न्हापांगु चरणय् जेठ १ गते निसें १८ गथे तक छेँजः सूचिकरणया ज्या क्वचायेकूगु खः । उकिया हे आधारय् थनिंनिसें असार १३ गते तकया दुने मुख्य चरणया जनगणना जुइ ।
नेपालय् न्हापांगु जनगणना १९६८ सालय् जूगु खः । वयां लिपा प्रत्येक झिखँय् छक जनगणना कायेगु यानाच्वंगु दु ।
