सहमति लिपा बस्नेतयात त्वःतेत आदेश / बस्नेतपाखें छटे जुइत अस्वीकार
गृहमन्त्री कृष्णबहादुर महरा व नेकपा (एमाले)या नेतात दथुइ जूगु वार्ता लिपा स्थानीय प्रशासनं युवा संघया अध्यक्ष महेश बस्नेतयात त्वःतेत आदेश बिउगु दु । तर स्थानीय प्रशासनया आदेशयात हाथ्या बिउसें बस्नेतं धाःसा प्रहरी नियन्त्रणय् हे च्वनाच्वनेगु अडान काःगु दु ।
विराटनगरया पत्रकार खिलानाथ ढकालयात आक्रमण याःगु द्वपं लानाच्वम्ह पर्शुराम बस्नेत थःगु नियन्त्रणय् दुगु धासें राज्ययात हाथ्या बियाच्वम्ह बस्नेतयात थौं सुथय् प्रहरीं ज्वंगु खः । विराटनगरस्थित प्रहरी तालिम केन्द्रय् तयातःम्ह बस्नेतं गृहमन्त्रीया राजीनामा माग यासें छटे जुइत अस्वीकार याःगु खः ।
बस्नेतं पत्रकार ढकालयात आक्रमण याःगु द्वपं लाःम्ह पर्शुराम ढकालयात लगे याःगु मुद्दा लितकायेमाःगु, पत्रकारयात आक्रमण याःपिं मेपिं निम्ह युवा संघया कार्यकर्तायात नं त्वःतेत माग याःगु दु ।
थ्वस्वयां न्ह्यः प्रधानमन्त्री झलनाथ खनालया निर्देशनय् एमाले नेता योगेश भट्टराई लगायतं गृहमन्त्रीनाप समस्या समाधान यायेत वार्ता याःगु खः । उगु इलय् एमाले पक्षं स्वंगू बुँदे माग तःगु खःसा गृहमन्त्रीं स्वंगूलिं माग पूवंकेत सहति प्वंकूगु खः ।
गृह मन्त्रालयं स्वंगूलिं माग पूवंकेगु प्रतिबद्धता प्वंकेवं युवा संघं कन्हय् यायेत्यंगु नेपाल बन्दया ज्याझ्वः लितकाःगु ख: । वार्ताय् गृहमन्त्री महरां पत्रकार ढकालयात आक्रमण याःगु द्वपं लानाच्वम्ह पर्शुराम बस्नेतयात नियन्त्रणय् कायेत युवा संघं ग्वाहालि यायेगु सर्तय् इमिगु माग पूवंकेगु सहमति याःगु खः । निगू पक्ष दथुइ युवा संघया अध्यक्ष बस्नेत लगायतया नेतातय्त त्वःतेगु, प्रहरीं बल छ्यःगु बारे छानबिन समिति नीस्वनेगु व घाःपाः जूपिनि वासः सरकारं याकेगु खँय् सहमति जुगु खः ।
तर बस्नेतं धाःसा थःगु हे पार्टीया नेतातय्सं याःगु वार्तायात अस्वीकार यासें थ्व युवा संघया विषय जूगु व उकिया बारे वार्ता यायेगु अधिकार थः नाप जक दावी याःगु दु ।
