'छुं नं हालतं माओवादी तज्याइमखु'
प्रष्ट रुपं स्वंगू खेमाय् खनेदुगु एकीकृत नेकपा (माओवादी)या नेतातय्सं छुं नं हालतं पार्टी तमज्याइगु दावी याःगु दु ।
चरम गुटबन्दीया हुनिं स्थायी समितिया मुँज्या तकं च्वनेमफयाच्वंगु इलय् थौं रौतहटया पिप्रा भलोहियास्थित जमाहरय् जूगु छगू ज्याझ्वलय् माओवादी नायः पुष्पकमल दाहाल 'प्रचण्ड', वरिष्ठ न्वकु मोहन वैद्य 'किरण' व मेम्ह न्वकु डा. बाबुराम भट्टराईं पार्टी विभाजनया पलेसा एकताबद्ध जुयाः वनीगु खँ धाःगु खः । स्वम्ह नेतातय्सं पार्टीयात छधी छप्पँ यायेत पार्टी दुने विवाद जूसां उकिं पार्टी विभाजन मजुइगु दावी याःगु खः ।
सहिद रितबहादुर खड्का व कौशल पण्डितया स्मृति सभाय् न्ववानादिसें माओवादी नायः प्रचण्डं पार्टीयात एकताबद्ध यानाः शहिदतय्सं न्ह्याकूगु क्रान्तियात लिप्पांगु इलय् तक ल्वानाः सफल यायेगु धयादिल । वय्कलं थः पार्टी नायःया ल्याखं पार्टी दुने खनेदुगु विवादयात क्वचायेकेत कुतः यायेगु धयादिल ।
वरिष्ठ न्वकु किरणं पार्टी दुने बैचारिक बहस जुयाच्वंगु धयादिसें थुकिं पार्टीयात झन् छधि छप्पँ यायेत ग्वाहालि जुइगु दावी यानादिल । वय्कलं पार्टी छुं नं हालतं तमज्याइगु ठोकुवा यानादिसें क्रान्तिया लँपुइ न्ह्यावनाच्वनीगु धयादिल ।
अथेहे मेम्ह न्वकु भट्टराईं पार्टी दुने जूगु आन्तरिक विवादयात वैचारिक विषयलय् जूगु बहस धयादिसें पार्टी तमज्याइगु खँय् धुक्क जुइत कार्यकर्तातय्त इनाप यानादिल । वय्कलं सहिदतय् म्हगस व क्रान्तिया लक्ष्ययात माओवादीं मत्वःतुगु धयादिसें क्रान्तिया लँपु पाःसां लक्ष्य धाःसा वहे जूगु धयादिल ।
माओवादी जनयुद्धया इलय् २०५९ साल असार २ गते भारतं पार्टीया मुँज्या क्वचायेकाः रौतहट जुया दोलखा वनाच्वंगु इलय् माओवादीया तत्कालीन केन्द्रीय दुजः रितबहादुर खड्कायात पिप्राभलोहिया गाविसय् सुरक्षाकर्मीतय्सं गोलीं कयेकाः स्याःगु खः । उगु हे इलय् खड्का नापं दुम्ह रौतहट दुजः कैलाश पण्डित नं सीगु खः ।
News Location:
