'पत्रकारतय् आन्दोलन प्रेस स्वतन्त्रता व कानूनी राज्यया निंतिं'
थीथी सञ्चार माध्यमया सम्पादकतय्सं पत्रकारतय्सं आः न्ह्याकाच्वंगु आन्दोलन प्रेस स्वतन्त्रता व कानूनी राज्यया निंतिं जूगु धासें नेपाल पत्रकार महासंघया आन्दोलन प्रति एक्यबद्धता प्वंकूगु दु ।
विराटनगरया पत्रकार खिलानाथ ढकालयात याःगु आक्रमण लिपा महासंघं यानाच्वंगु चरणबद्ध आन्दोलनया झ्वलय् थौं थीथी सञ्चारमाध्यमया सम्पादकतनापया अन्तक्रिया ज्याझ्वलया वक्तापिंसं आन्दोलन प्रति एक्यबद्धता प्वंकूगु खः । सञ्चारकर्मीतय्सं आन्दोलनयात राजनीतिकरण मयासें आन्दोलन न्ह्याकेमाःगु बिचाः प्वंकूगु खः ।
अथेहे इमिसं पत्रकारतय्त आक्रमण यानाः कानूनी राज्ययात हाथ्या बीपिंत कारवाही मयाःसा पत्रकारतय् मनोबल कुहांवनीगु प्रति दक्वसिनं बिचाः यायेमाःगु धाःगु खः । पत्रकारतय् म्वाःयेगु व च्वयेगु अधिकार सुनिश्चित जुइमाःगु माग नं इमिसं याःगु खः ।
पत्रकार महासंघया अध्यक्ष शीव गाँउलेया सभापतित्वय् जूगु ज्याझ्वलय् नागरिक न्हिपौया सम्पादक नारायण वाग्ले, रिपब्लिका न्हिपौया सम्पादक अमित ढकाल, कारोवार न्हिपौया सम्पादक प्रतिक प्रधान, साँधुया सम्पादक गोपाल बुढाथोकी, नेपाल टेलिभिजनया समाचार प्रमखु राजेन्द्रदेव आचार्य लगायतं थःथःगु बिचाः तयादीगु खः ।
