युवा संघपाखें प्रदर्शन / येँय् निगः गाडी च्याकल
युवा संघया अध्यक्ष महेश बस्नेतयात प्रहरीं ज्वंगु विरोधय् संघया कार्यकर्तातय्सं देय्या थीथी थासय् प्रदर्शन याःगु दु । विराटनगर, इटहरी, झापा, बुटवल, धादिङ लगायत थासय् प्रदर्शन यानाच्वंगु संघया कार्यकर्तातय्सं येँय् निगः सरकारी गाडी च्याका बिउगु दु ।
युवा संघ व अनेरास्ववियुया विद्यार्थीतय्सं येँया त्रिचन्द्र व शंरकदेव क्याम्पस न्ह्यःने गाडी च्याकूगु खः । प्रदर्शनकारीतय्सं त्रिचन्द्र न्ह्यःने नेपाल विद्युत प्राधिकरणया बा. १. ञ. १८३३ नम्बरया गाडी व शंकरदेव न्ह्यःने बा. १. झ. ५४७१ नम्बरया कार च्याका बिउगु खः ।
प्रदर्शनकारीतय्सं च्याकूगु गाडीया मि स्यायेगु कुतः यानाच्वंगु इलय् प्रहरीयात क्याम्पस दुने नं अप्पां कयेवं स्थिति तनावपूर्ण जूगु खः । प्रदर्शनकारीतय्सं अप्पां कयेकेवं प्रहरीं निगू राउण्ड अश्रु ग्यास प्रहार याःगु खः ।
