युवा संघया अध्यक्ष बस्नेतयात ज्वन
सत्ता नेतृत्व यानाच्वंगु नेकपा (एमाले)या भातृ संगठन युवा संघ (युथ फोर्स)या अध्यक्ष महेश बस्नेतयात थौं प्रहरीं ज्वंगु दु । इटहरीस्थित रिभारसाइड होटलय् पत्रकार सम्मेलन यायेत्यंगु इलय् बस्नेतायत ज्वंगु खः । विराटनगरया पत्रकार खिलानाथ ढकालयात आक्रमण याःगु अभियोग लगे जुयाच्वम्ह पर्शुराम बस्नेतयात थःम्ह संरक्षण बियातयाःगु दावी यनाच्वंगुलिं प्रहरीं बस्नेतयात ज्वंगु अनुमान या:गु दु । तर प्रहरीं धा:सा थुकिया बारे छुं नं जानकारी बिउगु मदुनि । प्रहरीं शान्ति सुरक्षाया अवस्थायात ध्यानय् तयाः बस्नेतयात विराटनगर यंकूगु दु ।
युवासंघं थौं विराटनगरय् प्रतिकार सभा यायेगु बारे इटहरीस्थित होटेलय् पत्रकार सम्मेलन यायेत्यंगु इलय् बस्नेतयात ज्वंगु खः । उगु पत्रकार सम्मेलन धाःसा पत्रकारतय्सं बहिष्कार याःगु खः । युवा संघया प्रतिकार सभा दुगुलिं जिल्ला प्रशासनं विराटनगरय् थौं न्हिच्छिया निंतिं निषेधाज्ञा जारी याःगु खः ।
बस्नेतयात नियन्त्रणय् कायेगु झ्वलय् प्रहरी व सुरक्षाकर्मीत दथुइ ल्वापु नं जूगु खः । बस्नेतयात प्रहरी ज्वंगु विरोधय् युवा संघं पूर्व बन्दया आव्हान याःगु दु ।
