कार्यदलं ज्या न्ह्याकल / शासन प्रणालीया बारे सहलह

संविधान निर्माणया झ्वलय् खनेदुगु विवाद समाधान उपसमिति अन्तर्गतया कार्यदलं थनिंनिसें ज्या न्ह्याकूगु दु ।

सिंहदरवारय् थौं च्वंगु कार्यदलया न्हापांगु मुँज्याय् संघीय शासन प्रणालीया बारे सहलह जूगु खः । कार्यदलया दुजःतय्सं शासन प्रणालीया बारे थःथःगु बिचाः तःगु खः । मुँज्यां शासकीय स्वरुप समितिं न्ह्यब्वःगु मस्यौदाय् दुथ्याःगु प्यंगू प्रस्तावय् नं सहलह या:सां सहमति धाःसा जुइमफुगु जानकारी कार्यदल संयोजक लक्ष्मणलाल कर्ण जानकारी बियादिल ।

कर्णया संयोजकत्वय् मंगलवाः उपसमितिया मुँज्यां न्याम्ह दुजः दुगु कार्यदल नीस्वंगु खः । उगु कार्यदलयात शासकीय स्वरुप, निर्वाचन प्रणाली नापं राज्य पुनर्संरचनाया बारे विवाद ज्यंकेगु जिम्मा बिउगु खः । कार्यदलय् खिमलाल देवकोटा, राधेश्याम अधिकारी, अग्नी खरेल व सपना मल्ल प्रधान दुजः कथं दु ।