'माओवादी व कांग्रेस दथुइ सहमति मजुइकं संविधान वइमखु'
संवैधानिक समितिया सभापति निलाम्बर आचार्यं दकलय् तःधंगु निगू दल एनेकपा (माओवादी) व नेपाली कांग्रेस दथुइ सहमति मजुइकं संविधान निर्माण सम्भव मजूगु खँ धयादीगु दु ।
रिपोटर्स क्लबं थौं येँय् याःगु साक्षात्कार ज्याझ्वलय् आचार्यं शान्ति प्रक्रिया नापं बिचाःया आधारय् निगू दलत प्रमुख जूगुलिं माओवादी व कांग्रेस दथुइ सहमति जुइमाःगु धयादिल । वय्कलं निगू दलत दथुइ सहमति जुयाः राष्ट्रिय सरकार गठन जूसाः जक संविधान निर्माण प्रक्रिया नं सहज जुइगु धयादिसें अथे मजूसाः संवैधानिक समितिं जक दबाव बियाः संविधान निर्माणया ज्या न्ह्याकेमफुइगु धयादिल ।
सहमतिय सरकारया निंतिं प्रधानमन्त्रीं राजीनामा बियाः मार्ग प्रसस्त यायेमाःगु धयादिसें आचार्यं राष्ट्रिय सहमतिया सरकार आःया न्हापांगु आवश्यकता जुइमाःगु धयादिल । प्रधानमन्त्री खनालं राजीनामा मबीकं शान्ति प्रक्रिया व संविधान निर्माणया ज्या न्ह्याः मवनीगु दावी नं वय्कलं यानादिल । वय्कलं सहमतिय सरकारया नेतृत्व कांग्रेसं यायेमाःगु बिचाः नं प्वंकादिल ।
नेपाःया इतिहासय् पार्टी दुनेया अन्तरद्वन्द्वया हुनिं बांलागु लिच्वः लाकीगु यानाच्वंगु धयादिसें आः नं थीथी पार्टी दुनेया अन्तरिक कलहयात साम्य यायेमफुसाः उकिं शान्ति प्रक्रियाय् लिच्वः लिकीगु दावी यानादिल ।
News Location:
