देय्न्यंक पत्रकारतय् धर्ना
चरणवद्ध आन्दोलनय् दुगु नेपाल पत्रकार महासंघं पत्रकारतय्त आक्रमण याःपिं दोषीतय्त कारवाही यायेमाःगु माग यासें थौं देय्न्यंक धर्ना बिउगु दु ।
विराटनगरया पत्रकार खिलानाथ ढकालनापं देय्या थीथी थासय् पत्रकारयात जूगु आत्रमणया विरोध व दोषीयात कारवाही यायेमाःगु माग यासें महासंघं येँया माइतीघर मण्डला व स्वनिगलं पिनेया जिल्लाय् जिल्ला प्रशासन ज्याकू न्ह्यने धर्ना बिउगु खः ।
थीथी सञ्चार सामाग्री सहित माइतीघर मण्डलाय् घौच्छि तक न्ह्याःगु धर्नाया झ्वलय् पत्रकारतय्सं दण्डहीनताया अन्त्य यायेत, पत्रकारातय्गु च्वयेगु व म्वायेदइगु अधिकार सुनिश्चित यायेत माग याःगु खः । धर्ना ज्याझ्वयलय् महासंघया उपाध्यक्ष यशोधा तिम्सिना,महासचिव ओम शर्मा, महासंघया पुलाम्ह नायः धर्मेन्द्र झा, नागरिक न्हिपौया सम्पादक नारायण वाग्ले लगायतं सम्बोधन यानादीगु खः ।
धर्ना ज्याझ्वलय् प्रमुख स्वंगू दल आवद्ध पत्ररकारतय् संस्था क्रान्तिकारी पत्रकार संघ, प्रेस चौतारी व नेपाल प्रेस युनियनया अध्यक्ष महेश्वर दाहाल, गगन विष्ट व किरण पोखरेलं नं महासंघया आनदोलनप्रति एक्यबद्धता प्वंकूगु खः ।
थ्वस्वयां न्ह्यः स्वन्हु तक ल्हातय् हाकुगु काप चिना विरोध याःपिं पत्रकारतय्सं असार २ गते येँ नापं थीथी जिल्लाया सम्पादकतनाप अन्तक्रिया याइगु, ३ गते ट्रेड युनियननाप अन्तक्रिया व ४ गते पत्रकार अक्रमणया दोषीयात कारवाहीया माग यासें संविधानसभा भवन निसें माइतीघर मण्डला तक व थीथी जिल्लाया सदरमुकामय् प्रदर्शन याइगु ज्याझ्वः दु ।
News Location:
