खुइन्हय्म्ह एसपीया सरुवा
गृहमन्त्रालयं नेपाल प्रहरीया खुइन्हय्म्ह प्रहरी उपरीक्षक - एसपीया सरुवा याःगु दु । मन्त्रालयं क्वःछिउगु झिंछगू बुँदे मापदण्ड कथं थनिंनिसें लागू जुइकथं सुरुवा याःगु खः । तत्कालीन गृह सचिव गोविन्द कुसुमया निर्देशनय् तत्कालीन प्रहरी महानिरीक्षक रमेशचन्द्र ठकुरीं या:गु प्रहरी अधिकृततय् सुरुवा निर्णययात गृह मन्त्री कृष्णबहादुर महरां बदर यायेवं वय्कःया हे निर्देशनय् सुरुवा जुइपिनि न्हूगु धल: दयेकूगु खः ।
गृह मन्त्रालयाया निर्देशन कथं यलय् भोगबहादुर थापा, ख्वपय् नारायणसिंह खड्का चितवनय् रविन्द्रनाथ शर्मा, कञ्चनपुरय् दिलिपकुमार चौधरी, कास्कीइ यादवराज खनालयात सरुवा याःगु दुसा येँया पुलाम्ह एसपी रमेश खरेलयात धाःसा पर्साय् छ्वःगु दु ।
अथेहे रुपन्देहीइ रविन्द्रनाथ रेग्मी, विराटनगरय् प्रधुम्न कार्की, सुनसरीइ राजु मानन्धर, धनुषाय् हरिबहादुर पाल, सर्लाहीइ मोहनराज जोशी, रौतहटय् घनश्यमा अर्याल व बाराय् सुरेश विक्रम शाहया सरुवा याःगु दु ।
जिल्ला प्रहरी ज्याकू मोरङया प्रमुख दिपककुमार थापायात अपराध महाशाखा येँ, विक्रमसिंह थापायात महानगरीय प्रहरी परिसर यलं २ नम्बर मुख्यालय येँ व राजेन्द्र श्रेष्ठयात ख्वपं केन्द्रीय प्रहरी विशेष कार्यदलय् सरुवा याःगु दु ।
