थनिंनिसें नेपाः बारुदी धराप मुक्त क्षेत्र

फुलचोकीइ च्वंगु अन्तिम बारुदी धरापयात नष्ट यायेवं थनिंनिसें नेपाः बारुदी धराप मुक्त क्षेत्र जूगु दु । सेनां फुलचोकीइ च्वंगु धराप नष्ट यायेधुंकाः प्रधानमन्त्री झलनाथ खनालं नेपाःयात बारुदी मुक्ता क्षेत्र घोषणा यानादीगु खः ।

झिदँ तक नेपालय् जूगु सशस्त्र युद्धया झ्वलय् आपालं थासय् बारुदी धराप लायेगु ज्या जूगु खः । शान्ति प्रक्रिया सुरु जुइधुंकाः नेपाःया थीथी ५३गू थासय् दुगु २ सय ५७ बारुदी धराप नष्ट यायेगु अभियान अन्तर्गत थौं लिप्पांगु धराप नष्ट याःगु खः ।

बारुदी धराप मुक्त क्षेत्र यायेगु झ्वलय् प्रधानमन्त्री खनालं धराप मुक्त घोषणा यायेगु ज्यां शान्ति प्रक्रियाय् महत्वपूर्ण उपलब्धी जूगु धयादिल । वय्कलं शान्ति प्रक्रिया क्वचायेकेत सरकार प्रतिबद्ध दुगु धयादिल ।