जनगणनाय् जाति भाषाया ल्याः
ख्वप (सन्ध्या टाइम्स)/ख्वपया च्यागू थीथी पुचःया मंकाः ग्वसालय् झोरबहिली भाषा, जाति व धर्मया खँय् राष्ट्रिय जनगणना सत्यतथ्य कथं जुइमाःगु खँय् जन चेतनामूलक गोष्ठी जुल। युवा बौद्ध पुचःया नायः धर्मरत्न शाक्यया सभापतित्वय् जूगु उगु ज्याझ्वलय् ख्वपया थीथी संस्थाया पदाधिकारीतय्गु नं उपस्थिति दुगु खः ।
ज्याझ्वलय् न्ववासें विराट नेपालभाषा साहित्य सम्मेलन गुथिया नायः त्रिरत्न शाक्यं थौं राज्यसत्ताय् च्वंपिंके छुं नं कथंया न्हूगु पहः मदु, स्वनिगलं पिने पहाड, मधेशया जाति, जनजातिपिं थःगु भाषा, जाति व थीथी अधिकारया लागिं दना वल तर स्वनिगः दुनेया नेवाःत धाःसा गुलि दने माःगु खः उलि मफयाच्वन धयादिल। वय्कलं यदि स्वनिगःया नेवाःतय्सं इलय् हे न्ह्यलं मचायेकल धाःसा कन्हय् थनं नेवाःत विस्थापित जुइमाःगु अवस्था नं वयेफु धयादिल ।
ज्याझ्वःया सभापति धर्मरत्न शाक्यं धर्म छगू आस्थाया विषय खःसां राज्यया भेदभावं बौद्धतय्गु ल्याः नं तथ्यांकय् स्पष्ट व बहुमत वयेकेमाःगु आवश्यक जूगु खँ कनादिल।
ज्याझ्वलय् बौद्ध सम्पदा संघया नायः पद्मसुन्दर शाक्यं लसकुस यानादीगु खःसा मैत्रीय युवा संघया नायः तीर्थराज बज्राचार्यं सुभाय् बियादीगु खः। ज्याझ्वः धर्मोदय सभा (ख्वप), मैत्रीय युवा संघ, भक्तपुर बौद्ध सम्पदा संघ, युवा बौद्ध पुचः, भक्तपुर मानन्धर ब्यायाम मन्दिर, नेपाल परम्परागत बौद्ध संघ, दिपंकर ज्ञानमाला खलः, बौद्ध संघया मंकाः कुतलय् जूगु खः ।
