राज्य पुनर्संरचनाया जिम्मा कार्यदलयात
संविधानय् खनेदुगु विवाद ज्यंकेत नीस्वंगु विवाद समाधान उपसमितिं राज्य पुनर्संरचना व राज्य शक्तिया बाँडफाँट समितिया प्रतिवेदनय् खनेदुगु विवाद ज्यंकेगु जिम्मा कार्यदलयात बिउगु दु । उपसमिति अन्तर्गत लक्ष्मणलाल कार्णया संयोजकत्वय् गठन जूगु कार्यदलयात राज्य पुनर्संरचनाया बारे न्हय्न्हुया दुने राजनीतिक सहलह यानाः प्रतिवेदन पेश यायेगु जिम्मा बिउगु ख: ।
थ्वस्वयां न्ह्यः उपसमितिं राज्य पुनर्संरचनाया प्रतिवेदन संविधानसभाया सचिवालयय् छ्वःगु खःसा उगु सचिवालयं समितिया प्रतिवेदनय् खनेदुगु ७८गू विवादीत विषययात म्हो यानाः २६गूलिइ क्वकायेफइगु सुझाव उपसमितियात बिउगु खः ।
कर्णया संयोजकत्वय् दुगु कार्यदलय् खिमलाल देवकोटा, राधेश्याम अधिकारी, अग्नी खरेल व सपना प्रधान मल्ल दुजः कथी दी । उगु समितिं राज्य पुनर्संरचना सम्बन्धी प्रदेशतय् ल्या, सिमाना नापं विवादय् लानाच्वंगु विषयलय् सहलह याइगु खँ धाःगु दु ।
थौं च्वंगु उपसमितिया मुँज्यां संविधान निर्माणया झ्वलय् विवादय् लानाच्वंगु विषयलय् राजनीतिक सहमति आवश्यक जूगु निष्कर्ष पिकागु खः । सोमवाः हे उपसमितिया मुँज्या च्वनीगु धाःसां उपसमितिया संयोजक नापं माओवादी नायः पुष्पकमल दाहाल 'प्रचण्ड' विरामी जूगुलिं मुँज्यां थौं जक च्वंगु खः ।
